DR HANSJAKOBLI UND DS BABETTLI Mani Matter

 

Dr Hansjakobli u ds Babettli

hei mit em Chuchitaburettli

es Spieli zäme gschpilt zum göisse

"he he Frou Meier" het das gheisse

 

Da isch zum Bischpiel zersch ds Babettli

druf gchlätteret uf ds Taburettli

u Hansjakobli wo süsch zaaget

isch tifig tifig drunder gschnaaget

 

Ganz lut het obehär ds Babettli

jitz gschtampfet uf das Taburettli

bis dass dr Hansjakobli dopplet

so lut het undenufe topplet

 

U grüeft: "he he Fou Meier machet

doch nid so Krach!" - da hei sie glachet

u er isch obe gsi äs unde

u ds Spiel het disewäg stattgfunde

 

Vowägee grad so i däm Spieli

wie zgrächtem - Bischpiel git es vieli -

isch jede daderfür wird gchrampfet

gärn dä wo obenabe stampfet

 

Es isch nid jede wie ds Babettli

so harmlos uf sim Taburettli

drum luegit dass wie Hansjakobli

geng einen undenufe toppli

I wett fasch säge: "D'Wält wär freier

we meh würd grüeft: He he Frou Meier!"